^{KA KIZAWH SA HI NA PI’N}

Ka lunggulh leh ka pomden thu in ahih leh,
Kei nuntakna hangin mi te’n phatna a ngah tuam na ding hi.
Ka neulai in leitung ka nusiat nop dan ngaihsun thei zel ing.
Sih theihna nam tampi om ta se mah leh aman nei in ka si nuam a,
Mi khat huh laitak, ahih kei leh ka hotkhiat laitak sih ding ka ut hi.

Nikhat ka nasepna ah makai pi te in meeting hong samin
Tukum bei lam leh maikum kikal dong, a kisap zen zen leh
Gal kuan masa pen ding te hihang ci in thuzaksak na hong nei hi.
Ka zak thu hangin ka ngaihsutna hong tam lua vat in
A sia pen ding thute ka ngaihsut teh nakpi takin
Ka dip hong kisai in lau mah mah hi ing.

Tua laitakin Zeisu in Gethsemane huan ah
A thungetna ka phawk kha hi.
Zeisu in zong hong kipiak khiatna hangin
A thuak ding thu a ngaihsut teh
Hamsa sa lua in, a dah na hangin sidek tak ing ci ngau ngau mawk a,
A thuak ding thu ngap hetlo ahih manin, ahih theih leh
Hih tawh hong kipelh sakin ci in
Pa kiangah thum ta se mah leh, Pa deihna tawh na khup hi.

Hih thu in a thak in Zeisu hong itna,
Kei tang dingin hamsa pi takin hong thuakna
Hong phawk sak kik hi.

Matthew 26: 37-39
“Tua ciangin Peter le Zebedi tapa tegel tonpih a, dahin a lunggim hun ding a kipan hi. 38.Amaute kiangah “ Ka lungsim dahna hangin ka si dektak hi. Hih lai-ah na om unla hong ngak un” a cih khit ciangin 39 tawmkhat pai lai-in leilakah bokin thu ngen a, “Pa aw, ahi thei ding ahihleh hih thuak nading tawh hong kipelhsak in. Ahi zongin kei’ deihna bang hi loin, nangma deihna bang hizaw ta hen” aci hi.