Kei pen ka neulai in mite neu et a thuak thei zel mikhat hi’ng. US tun cil pau theih loh manin sanginn ah hong ki ko thei zel hi. Tua bek zong hilo, Ka tan 5 kumin ka sangkah pih numei khat pen gilo lua ahih manin kei leh ka lawmte thu om lo pi in hong nawng kai sak zel hi. Kei pen a neh no mi khat ka hih manin kap sim den hing. Tan 7 kum in hong suk tek tek hi. Ken tua kum in ka sam tan tawng in pasal tawh kisun ka hih na tawh zong hong ki nuihsan leh hong kiko na tawh ka kimuanna pen tampi tak hong kiam han han hi.
Tua hun lai in haksa ka sak mah mah hangin, tun kum tampi a pai khit ciang, ka ngaihsut kik teh, Pasian in hong seekna hi ci’n ka sang hi. Tua ka tuak thu tung tawnin mi telsiam na, ki muanna (Confidence) neilo mite veina leh, ka kiphatsak na ding thukhat zong a om loh na phawk cih takin phawk den hing.
Hih tung tawnin nu leh pa mangpau thei lote zong ka tel siam mah mah a, bang zah in nuam lo leh bang zah in haksa cih zong ka tel pih mah mah hi. US tun kum sawm bang hong phak hangin mang te lakah a pau mel lo khat ka hih manin, mangpau zong kei adingin haksa mah mah lai hi.
Kei pen ka neu lai kimuan na nei het lo ka hih manin, ka hih ding leh ka siam ding tampi tak tua in hong khak tan hi. Ka sangkah na ah mi’n hong deih ken teh cih tawh ho ngam ngei loh leh pau ngam ngeilo ka hih manin, ka mangpau siam ding zah in zong siam lo hing. Tun kimuanna neilo mi khat ka muh teh, kei bangin a ma uh a ki khak ding ka dah pih mah mah hi.
Tua bangin hong kisim mawh na in, kei pen bang mah mi hi lo hing. Mipil, misiam, mihau leh mi hoih lah hi keng cih hi. Tua hangin leitungah Zeisu hang bek in mi man nei ka hia, ka kiphatsak nop leh zong ama hang bek hi ta hen.
Tua bang thu te ka ngaihsut ciangin, tu laitak thuak hak ka sak mah mah thu khat tungah lamet na lian hong pia hi. Tua in, Pasian in kei hong seek na hi a, tua hamsatna hangin zong ka lungdam thei ta hi.
Ka lungsim ah hong kilo den khat pen, hih dan ka tuah na pen Pasian in ka kiphatsak lo na ding a hong seek hi. Tua teh, Pasian in mailam ah hong zang nuam ahih manin, mitel siamna, kiniam khiat zawhna leh Zeisu lungsim ka puak thei na ding in hong seek hi cih hi.
Munsang ah na tun ciangin, na nunlui te phawk den in. Na theih sa thu te kiphatsak na in nei kei in la, mi huh na in nei in. Thukhat peuh peuh kiphatsak na dingin leh lungkiatna dingin a tuak na hi kei a, mi dang kiangah na hawpsawn theih na dingin a tuak na hi hi.
Leave a Reply